السبت، 12 مارس، 2011

باب الأوضة المقفول


باب الأوضة اللي حاوت أفتحه
طلع مقفول بالمفتاح
من جوه
وقفت..أشد فيه ..

بكل قوتي
ونسيت خالص إني أنا اللي قافلاه عليا

ومع إن المفتاح قدامي .. متعلق في الباب
زي المشنوق
اللي مستني حد ينزله من علي حبل المشنقة
زيي بالظبط

الفرق .. إنه مات وإرتاح
وهو معدن
وأنا كمان معدن

أنا لسه فاكرة .. لما كنت بكلم واحدة صاحبتي

قالتلي .. بسمة إنتي معدنك أصيل ونضيف

معرفش ليه كنت عايزاها تقولها بعلو الصوت
كان نفسي ناس كتير تشوفها

مش عشان يشكروا فيا
لأ..عشان مش ناقصه خربشة تاني



خربشة .. بالظبط 

 أول مره أحس إن في جمل ممكن توقف الوقت
 وإن في كلمة ممكن توقف الوقت
وإن الوقت بيقف .. والعمر مش بيخلص
زي ما تكون الساعة بقت من غير عقارب


أول مره أكتشف إني بخاف م الوقت
المنظر ده مرعب
مرعب أوي

  



 
 

 
  

الجمعة، 11 مارس، 2011

كلب !


كلب واقف عند رجلها
شكله جعان .. 
 جربان .. 
مُقرف  .. 
وفي حالة من الذل  
يمكن لأنه  مهما طلع أو نزل .. كلب !

ست بسيطة ، بتنضف قدام المحل 
توقعت إنها هترميله أكل
واستنيت أشوف .. يمكن تشفق عليه  
معرفش ليه استغربت جدا لما جابت ميه مش نضيفة 
ورشتها عليه
مشي بنتهي السهولة  
وشتمته .. عشان يبعد أكتر 
  
وعجبتني !