الجمعة، 31 أغسطس، 2012

جواب 2

صباح الخير

إزيك يا ربنا

بعتلك جواب امبارح، رسالة

ملقيتش رد مكتوب، بس لقيتها seen

المهم

أنا حبيت أشكرك على الهدية اللي بعتهالي النهاردة

الهدية اللي  المفروض إنها تعيطني

انت أكيد عارف إن العياط بيريحني..

وإن بحب الهدايا اللي بتلمسني

بس أنا مرتاحتش، ومعيطتش

ومبقاش نفسي في هدية تعيطني

نفسي أجرب أفرح شوية، فرحة للآخر

وانت عارف مقاسات الفرحة اللي هتلبسني

مرة واحدة بس..

ممكن؟

عشان خاطري

أنا معرفش بكلمك كده ليه
بس ده الحل الوحيد اللي قدامي
إنت أكيد فاهم قصدي

هستنى ردك


بسمة 



الأربعاء، 29 أغسطس، 2012

جواب لربنا

إزيك يا ربنا ؟ عامل إيه ؟

أنا عارفة إنها مش طريقة كلام معاك زي ما بكلم الناس
بس عارفة برضو انك هتعذر جهلي، أنا بحب أكلمك بطريقتي مش بكلام محفوظ وخلاص
انت عارف إني بحب أقولك كلام أنا حاساه

المهم
أنا عايزة أقولك إنك وحشتني جدا لدرجة إني عايزة أبوسك وأحضنك 
هو ينفع؟ معرفش 
المهم إني عايزة أشوفك 

عارفة إني لما أشوفك هسكت
مع إن عندي أسئلة كتير

بس هو أنا كده لما بحب حد بسكت معاه
أنا بعاني من المشكلة دي
إني بتكلم طول مانا مبحبش
وأول ما بحب بسكت
يمكن لأني بشوف الحب أفعال مش كلام 

طب أنا عايزة أتكلم معاك
بس في حاجة مانعاني معرفش إيه هيا
يمكن الوقت مش مناسب، أو أنا مش مستعدة، أو مكسوفة
ممكن تساعدني؟

هستنى ردك
بوسة 
بسمة