الجمعة، 27 يوليو 2012

فن الحرب 1

أنا بحارب، في معركة مش بتاعتي، كان ممكن جدا أسيبها بسهولة، بس الندالة والجدعنة طبع، والضمير كمان .. أنا بحارب وحش معرفوش ومش قادرة أسيطر عليه ولا أعرف خطته في الهجوم المضاد .. أنا بحارب مرض !


لما تبقى بتحارب، حاجات كتير بتقع منك، خوذة، فلوس، أصحاب قريبين، كل اللي بيقع مش مهم، ومتبصش عليه لأنه هيلخمك.. الحاجة المهمة هي إرادتك اللي بتخليك تكمل. في النهاية هتكتشف إنك لوحدك تماما، لكن كل اللي وقع منك، كان معطلك، ومن غيره، انتصرت.




- مبقتش أبص على الحاجات اللي بتقع مني، حتى لو كانوا أعز أصحابي - أو أنا فاكراهم وبعتبرهم كده، أنا بحارب حد صاحي 24 ساعة.. لازم أبقى صاحية جدا في كل الأوقات وببص حواليا في كل الإتجاهات.. حالة التأهب القصوى اللي عقلي وجسمي فيها بتخليني أهمل أي حاجة تانية.. أي حاجة.




- اكتشفت إني مش مهم إني أحارب بس، وللنهاية.. زي ما هي كانت بتقولي "حاربي للآخر.. مش مهم تكسبي أو تخسري، بس المهم تحاربي بشرف للآخر".. ساعات الحياة بتفرض عليك تحارب وتنجح.. وبيبقى اختيار الهزيمة معناه الموت، وحش جديد هتحاربه طول مانت ميت...إلى ما لا نهاية.


- في ناس ممكن تزعل منها بسبب حاجة عبيطة، بس في الحقيقة هي مش عبيطة ولا حاجة، هي تراكمات، كتير،  لدرجة إنك بتبقى مستني له غلطة عشان تصب عليه لعنتك على كل غلطاته، وبتبقى نظرية الثواب والعقاب ظاهرة أوي في الجزء ده .. إحنا بنمارس أفعال الآلهة على الضيّق.


- في الحرب، ربنا بيبعتلك هدايا، بتنزل عليك من السما فجأة، كأنك بتلعب جيم كمبيوتر بالظبط، بعد كل 3 أدوار جرب وتنطيط وحرب ، تلاقي ياقوت وألماظ وقعوا عليك. زي ما بتحافظ على تأمين نفسك طول الوقت وانت بتحارب، لازم تاخد الهدايا، مكافأة لتعبك، ولأنك هتحارب بيها قدام.



-فكرتي عن نفسي طلعت غلط خالص، كنت فاكرة إني بت خيخة وأي كلام، كل الناس اللي حواليا بيقولولي إني قوية، قوية جدا..معرفش بكدبّهم ليه !


- أسوأ ما في الحرب، هم الأغبياء واللزجين، وعدوّك كل ما كان ذكي.. كل ما كانت الحرب متعة


- بقالي تلات أسابيع، كل ما حد يتصل بيا مبيقوليش غير "انتي بـ 100 راجل".


- الثقة في ربنا، ودماغك،  هم أكتر سلاح هيفيدك، مهما كانت الأسلحة المادية عظيمة


مش مهم تحقق السلام في العالم، المهم تحققه جواك