الاثنين، 8 نوفمبر 2010

خايفه

النهارده كنت في مشوار في مكان بعيد عني جدا
وأنا رايحه..لفيت كتير وفضلت أركب مواصلات وأتنطط
وبعد ما خلصت مشواري وفي الطريق وأنا مروحه
جالي إحساس إني خايفه
من إيه..معرفش
بس فكرت في حاجه
الخوف زي الحادثه..والناس وقت الحادثه ليها ردود فعل غريبه
كل واحد رد فعله حسب شخصيته
يعني  في ناس بتخاف وتقف مكانها
وفي ناس بتخاف وتجري
وفي ناس وقت الخوف بتطلع أفكار عبقريه جدا..وهكذا

أنا فهمت اللي خوفني
الدنيا بتكبر فجأه
إحنا كل ما بنكبر ..الأماكن بتصغر
زمان بيتنا كان كبير أوي
وكنت بخاف أنام في أوضتي لوحدي من كتر ما هي واسعه
دلوقتي الدنيا بتكبر..
والبيت بشوفه بيصغر
وأوضتي بقت عاديه..وساعات بحس إنها صغيره كمان

آخرها إيه؟
يعني الدنيا الواسعه دي اللي بتصغر كل حاجه..ممكن تبلعنا؟
ليه كل ما بنكبر بنشوف الحاجات اللي ليها قيمه واللي كنا بنحبها بتطلع في الآخر ولا حاجه؟

ليه الدنيا بتعمل فينا كده؟
النهارده حسيت إنها مش الدنيا
الناس هم اللي بيعملوا في نفسهم كده
أنا اللي خوّفت نفسي
بس اللي خلاني شوفت ده

الكوبري بتاع موقف العاشر
كنت بعدي من عليه..وشفت الشمس من فوق
كان منظر الغروب جميل..والمنظر من بعيد أروع
بصيت لتحت لقيت الناس شكلهم غريب
زحمه أوي,,مع إن دي منطقة واحده,في حته واحده
..اللي واقف ياكل,واللي بيجري ع الميكروباص واللي يشد إبنه واللي واقف يعاكس
الناس مشغوله بحاجات عبيطه أوي..وسايبين الغروب
أنا أكيد مش غريبه عن البشر
مانا كمان كنت متأخره وتعبانه وهموت وأنام
بس في نداء
في جمال بيفرض نفسه علي العالم
وفي رهبه..من الغروب
دقيتين بالظبط علي ما ركبت الميكروباص


الشمس إختفت
أنا تنحت..دي كانت كبيره وماليه السما وقولت هتاخد وقت علي ما تغرب
الغروب بيحصل في هدوء
الدنيا بتبلع الشمس من غير ما نحس
عارف إحساس إنك بتتشفط..بتتسحب..بتتاخد..بتتسرق..
بتصحي وإنت أصلا مكنتش نايم
تلاقي إنك مش إنت وإن "إنت" إتاخد منك متعرفش إزاي؟  
كنت مُغيّب


 دوامه الدنيا بتبلع الناس من غير ما يحسوا
وده كان سبب خوفي

جالي إحساس إني عايزه أمسك إيدك أوي
لأ..عايزاك تمسك إيدي 
مش عشان خايفه
عشان أطمن..ومتسألنيش إزاي أطمن وأنا مش خايفة
مش عايزه أفهم ليه ولا إزاي
عايزاك تبقي جنبي وخلاص




خليك معايا..:)



الأربعاء، 20 أكتوبر 2010

فهمت؟

ويوم أجيء إليك لكي أستعير كتاب
لأزعم أني أتيت لكي أستعير كتاب
تمد أصابعك المتعبه
إلي المكتبه
وأبقي أنا ف...ي ضباب الضباب
كأني سؤال..بغير جواب
أحدق فيك..وفي المكتبه
كما تفعل القطه الطيبة
تراك اكتشفت؟!
تراك عرفت؟!
بأني جئت لـ غير الكتاب
وأني لست سوي..كاذبه..;)


السبت، 16 أكتوبر 2010

الخميس، 14 أكتوبر 2010

:)

أنا بجد بجد..مش عارفه أقولك إيه


بحبك أوي


علي طول حاسس بيا وبتمشيني في طريق الخير

مهما كنت بغلط أو بنسي..إنت دايما كبير


يارب..



الأحد، 10 أكتوبر 2010

يارب



كل البيبان إتقفـّلت...
مافاضلش غير بابك يارب
:(

السبت، 9 أكتوبر 2010

صباح الخير..:)

صباح الخير
صباح جديد وإنت مش فيه..وسايبني لوحدي
بس برغم كل ده..حاسه إنك معايا
جوايا
أنا معرفش إنت عامل فيا إيه عشان أحبك أوي كده
ومش عايزه أعرف
مش عايزه أفكر في حاجه غيرك
أقولك علي حاجه
؟
صباح الخير وإنت واحشني
:)

الجمعة، 24 سبتمبر 2010

الثلاثاء، 24 أغسطس 2010

أريدك..لأرتقي


 


لأني في أحضانك أضعف,أبسط ,أزهد في كل العالم..إلا أنت.

لأنك بحضورك الطاغي تكسر غروري الأنثوي برفق,وتثبت لي أن هناك من يستحق الإنحناء له إحتراماً في هذا الكون دون  ترفّـع عن البشر.

لأنك راقي بصدقك,وعادل بذكائك,وحنون بنظراتك,ودافيء بلمسه يديك

لأني حين أمسي أحلم بك لتذهب عني وحشه الليل وظلامه وأستبدلها بنجوم تضيء ليلتنا الخياليه,وحين أصبح أول ما أذكره إبتسامتك لتكون بمثابه إشراقه ليومي الجديد

لأني أتعلم منك الكثير,تهذبني بكلماتك ,وتشعلني بصمتك,ويتشكل العالم وفقاً لمنظورك..

أريدك.لأني أحببت نفسي معك,وأحببتك معي

أريدك لتملأ فراغات قلبي الباحثه عنك,المدمنه لذكراك,المتلهفه لرؤيتك

لأن وجودك أصبح ضروره حتميه لأشعر بكوني علي قيد الحياه..فهل تأتي؟ 

الجمعة، 20 أغسطس 2010

ياللي إنت حبك..حريه

بص الصوره دي..


أنا في المود ده..
عارف
هي معناها ريشه متعلقه..مش حره..مش بتطير
يمكن فاكرني أقصدك..


إمبارح اول ما شوفتها ..خطفتني
حسيت إنها أنا..
بعدين قولت إزاي؟..
عمر ما إحساسي ناحيتك قيدني
بالعكس..
وأنا معاك ببقي طايره
ببقي حـُرّه 
بحس كل جمال ف الدنيا
ومن غيرك ببقي كده..
مستنياك..:)

الأحد، 15 أغسطس 2010

واحشني جداً

إنت إزاي كل الوقت ده بعيد..؟
مجاش ف بالك تسأل؟؟تطمن عليا؟
أنا بجد محتاجالك أوي
أكتر من أي وقت فات


عارف..لما حد بيدخل أونلاين ع الميل
أو التليفون يرن فجأه..
قلبي بيتخطف..كأنك جيت
وبرجع تاني بزعل أكبر لما يطلع مش إنت..


مليش نفس أكلم حد..ولا أرد علي حد
إمبارح إكتشفت إن ماما قاعده بتكلمني بقالها نص ساعه
وأنا مش سامعاها..
عايزه أقعد ف أوضتي وأقفل عليا
مش عشان هبقي لوحدي
لأ..عشان ده المكان الوحيد اللي فيه حاجات منك
كتابتك
صورك
كلامك
ذكريات وأحلام جميله..


إنت إزاي مجيتش؟
أنا..يمكن زعلت..اترفزت ..اتضايقت
كنت بقول أي كلام..
أي حاجه يمكن ترد
وبرضو مجيتش..


مكنتش عارف إني امبارح بموت
وكنت حاسه بروحي بتتسحب مني 
وكنت بس عايزه أسمع صوتك..
ولو هتسكت..بس أحس إنك جنبي


لما فوقت..لقيتني هموت تاني
يمكن فاكرني ببالغ
بس لو شوفتني وانا مستنيه رنه..رساله
تحييني تاني..
يمكن تصدق 


واحشني أوي
بكلامك 
وسكوتك
وحركاتك 
وكل حاجه

مفيش حاجه هتريحني قد إني أشوفك
مش هتريحني؟


السبت، 14 أغسطس 2010

زعلانه منك

زعلانه منك..
مش هقدر أخبي..لأنك أقرب حد ليا
زعلانه لأنك..عارف 
لأني مش المفروض أكتبلك..
لأنك أكتر حد لازم يبقي جنبي من غير ما أقوله
مش عشان لازم..
لأ..عشان هو عايز يبقي جنبي..

عارف..
أول مره أبقي مش لاقيه كلام أقوله 
أو أكتبه..






الأربعاء، 11 أغسطس 2010

الحاجات اللي وحشتني


من صداع العصر بلجألك يا بلوجايتي من صداع بيلتهم دماغي بقاله 6 أيام وداخل ع السابع صداع بيفكرني إن الموت لحظه..والحياه برضو لحظه..فكرني بلحظات جميله



بأول ما رجعت من السفر وكنت بقرف أوي من العيش والمياه ف مصر كان طعمهم غريب..والناس كمان كان شكلها غريب بعد كده عرفت السر..لما بقيت منهم ..
 

من فانوس رمضان اللي عمري ما جبته,ولا جالي ,دايماً بشوفه من لبعيد لبعيدمعرفش ليه ,الفانوس ..بيفرّح الناسي مكن عشان هديه ف مناسبه جميلهأو يمكن عشان بينوّر..حياتهم المضلمه




وحشتني أوي أيام ثانوي درس العربي اللي كنت باخده وسط مجموعه ولاد لوحدي,وكنت أشطر واحده فيهم..ومكانوش بيطيقوني وعلي آخر السنه..كنت أشطر واحده فيهم برضوبس خليتهم يحترموا كلمه بنت..



ودرس الإنجليزي اللي برضو كنت باخده مع مجموعه ولاد ومكنتش بروحه غير كل فين وفين ,مع إنه قدام بيتنا بالظبط ,بس كنت بتخنق منه



الواد الأمور اللي كان بيقعد يعاكسني طول الحصه,وأنا كنت هبله وكنت فاكراه بيغيظني..اللي لما شوفته بعد كده ب 3 سنين كنت هتف وأقول..إيه المنظر ده!


وحشني مستر ماهر اللي كان بيدرسلي إنجليزي,ومكنش بيحب يشرح غير من كتابي,وكان لما يحب يسأل علي حاجه يخلي كل الناس تجاوب الأول ويخليني للآخر..عشان عارف إني هجاوبها صح



إفتكرت حاجه..أنا عمري ما ذاكرت..غير ف أيام الإمتحانات,طول الوقت فاكرينني البت الشاطره الدحيحه,وأنا زيي زي أي حد بيفتح الكتاب ليله الإمتحان,ويمكن يوم الإمتحان الصبح ..يمكن..عشان واثقه ف دماغي
بس أنا أصلا مبحبش المذاكره,مش كفايه إن الكتب سخيفه..وكمان بيفرضوها علينا !!


وحشني يوم الإتنين..اللي كنت بصحي بدري لوحدي,وألبس وأروح المدرسه من غير خناقه مع ماما عشان الغياب,وأبقي أول واحده تحضر الحصه..حصه الرسم..اللي عمري ما فوّتها ولا غبت فيها



وحشتي ميس جيرمين..أول واحده شجعتني إني أرسم,نظرات عينيها اللي كانت عايزاني أحسن,رسمها التقليدي..اللي لما بفتكره دلوقتي مرسوم ع السبوره,كأنه مرسوم ف دماغي..كانت مدرسه رسم مبتعرفش ترسم..بس بتعرف تحس !


وحشتني البت اللي بتتكسف..اللي بتاخد الكتب بالحضن وهي ماشيه وشها ف الأرض من كتر كسوفها ..والناس فاكرينها ضعيفه وجبان..هأنا كنت بتكسف لدرجه إني مبقدرش أبص ف وشهم..


وحشتني إيمان صاحبتي..كانت رغايه رغي الإبل,وأما كانت تيجي تخبط علي باب بيتنا الساعه 9 بالليل وتعيط وهي منهاره,ولما أقولها في إيه؟تقولي البنطلون الجينز بتاعي وقع عليه حبر !



وحشني أ /سيد اللي كان كل ما يشوفني يقولي إنتي أطيب من أختك,ودرس الفيزياء والكيمياء اللي كنت باخده عنده,وتعبيرات وشه لما شاف النتيجه50 فيزياء..49 ونص أحياء..و30 كيمياء يا مفتريه !!


وأستاذ سعيد اللي كان بيقولي يابت إنتي ذكاءك حاد ومش باين عليكي,لو ركزتي هتكسري الدنيا..وأنا أقوله..مانا عشان كده مش عايزه أركز !


وأستاذ هشام اللي كان بيقولي إنتي أصيله ويقعد يغيظ أختي بيا 
وحشني الكلام اللي طالع بجد من القلب..مش مجاملات..طالع من جوه ,,بحب أفتكر الكلام ده عشان حسيت بصدق من اللي قالوه.مش مهم كان حلو ولا وحش


الراجل اللي كان بيعاكسني كل يوم الصبح وكنت بنفضله
 والراجل اللي قفشني مره وأنا بضحك لما إفتكرت ساره صاحبتي 
جه قدامي ووقف وقالي..انتي كنتي بتضحكي..؟
!مشيت بسرعه..وكنت ميته م الضحك


وحشتني أيام الكليه,.المشروع,,الأيام اللي مكنتش بنام فيها من كتر التعب والنكد 
الأيام اللي كنت بحس فيها إن روحي هتطلع خلاص 
وخوفي مش من إني أموت..خوفي من إني أموت وربنا زعلان مني 
كل حادثه خرجت منها سليمه..قولت أكيد في سبب 
أكيد عايشه عشان حاجه 
وكنت بقعد أقول لنفسي..أنا مت موتات أحلي من دي بكتيييييييير



وحشني جناني..اللي بعمله واللي بيتعمل فيا من أيام ما كنت برن جرس باب الفصل وأجري وألزقها في حد من صحابي
ومحدّش بيشك فيا..لأني هاديه قصاد الجميع ..لحد المقالب اللي أنا وأصحابي بنعملها ف بعض


وحشني الجنان الرومانسي..اللي محصلش أصلاً 
لما حد يصحيك ف نص الليل عشان يقولك بحبك ويقفل تاني
 لما حد يبقي متضايق وزعلان وفجأه كل حاجه تخلص ..بإبتسامه
 لما تبقي متخانق مع حبيبك/حبيبته وتتصل بيه وتقوله..آه هو كده..حقي يا جدع أومال هتخانق مع مين؟
 والكلام اللي تقعد تفكر فيه وتجهزله ساعات..وأول ما تشوفه..بخ..كأنك أخرس ولا تفتكر أي كلمه
بوكيه الورد اللي بييجيلك فجأه ف وسط أصحابك
ولما تخلص عرض فودافون 1500 رساله علي شخص واحد
حتي لو كانت رسايل فاضيه


الولد اللي كان بيحبني ومكنتش أعرفه..
وبييجي ينده عليا من تحت البلكونه 
فهموني ساعتها إنه مجنون.. 
مكنتش أعرف إنه مجنون بيا..!



والولد اللي نده مره ف مترو التحريرالساعه 3 الضهر
..ف عز الزحمه..بصوت عالي
 يا بسمه..يا بسمه.. 
والناس كلها وقفت تشوف مين بسمه دي 
أنا كنت متأكده إنها أنا..متسألنيش إزاي 
بس جريت وركبت بسرعه.. 
وخفت أبص ورايا..لتكون أنا فعلا ً !



الست اللي قعدت جنبي ف الميكروباص 
وحطت كرمبه علي رجلي....واتضايقت أوي 
ولسه جايه أكلمها..ببصلها لقيتها شبه أمي جداً 
سكت..ولما نزلت أنا وهي ..شلت معاها لحد ما وصلتها


وحشتني اللحظه اللي غمضت عينيا فيها ع البحر في العين السخنه
 وإستسلمت أوي..وغرقت وحسيت إني بغسل دماغي من جوه 
وجت واحده صاحبتي رخمه فوقتني منها بكل غلاسه


وحشتني الدنيا لما تمطر
 والناس في عز البرد يجروا يستخبوا..إحم إحم
 وأنا كنت بجري تحت المطر 
وبفتكر نزار قباني معرفش ليه 
ويبقي نفسي يكون حبيبي جنبي والدنيا بتمطر.. 
ويعمل الحركه اللي اتعملت ف كل الأفلام ويقلع الجاكت ويدفيني بيه 
وبعد كده..إحم..المشهد ده إتشال ف الرقابه 
هي الدنيا بطلت تمطر من شويه..:D


وأنا صغيره..
كان بيجيلي صداع كتير من كتر اللعب بحاجات إليكترونيه 
بلاي ستيشن وأتاري وحركات من دي 
وكنت بروح لدكتور هندي بما إني مكنتش هنا 
كل مره كان بيقولي إني معنديش حاجه 
كان بيتكلم إنجليزي مع بابا ومكنتش بفهم بيقول إيه..
 كل اللي فاكراه ضحكته الطيبه,ولما كان بيعملي التحيه الهندي..ويديني شوكولاته ..


بس البنت اللي كانت الشوكولاته بتنسيها الصداع زمان..مبقاش ينفع معاها شوكولاته دلوقتي..:)

من ورا قلبي..

بحبك ف رمضان


لأنك حبيبي
رغم الصيام..هقولك حبيبي
لأن صيامي ..صيام الروح
ولأنك روحي
مبقدرش أصوم عن تفكيري فيك

لأنك أنا..
لأنك جوارحي ..بتجري ف دمي
وحبك طبيعي ..زي حب أمي
مينفعش أفصل نفسي عنك

مينفعش تيجي ..
ومينفعش أروحلك
ومينفعش أبوحلك
وأقولك.. واحشني


هبطل أبص وأكلم ف صورتك
وأمنع نفسي أتوه ويا صوتك
كفايه عليا إني ف صيامي
حاسه براحه لما أقول بحبك

لأن شيطاني بعيد عني شهر
لأن نَفسي مبتطاوعش أمر
لأني هدعي ف ليله القدر
تكون إنت ملكي..وأبقي أنا ملكك

كل سنه وإنت طيب..
كل سنه وإنت حبيبي





الأربعاء، 4 أغسطس 2010

أنا مش هقولك علي حاجه تاني

آه بقي..

عارف..من ساعه ما صارحنا بعض بحبنا وإنت بطلت تقولهالي
بطلت تقولي بحبك..وحشتيني ..
معرفش ليه..
بس اللي اعرفه اني بحتاج أسمعها ف كل ثانيه..
مش عشان أتأكد..
لأ..عشان مممممم بحبها,بحب أسمعها منك

إمبارح بس إكتشفت حاجات كتير أوي..
زي مثلاً انك طول مانت مش معايا بفكر فيك
لما ييجي هقوله واقوله واقوله..
بفكر ف 5000 حاجه أقولهملك..
وأول ما تيجي..ببقي عايزه أبصلك وبس.
وبنسي كل حاجه
تصدق ساعات مبلاقيش كلام
ببقي عايزه أسمعك تاني وتالت ورابع..
حتي لو مش بتقول حاجه مهمه
انت وجودك بس ..كفايه..

ودي برضو مش هقولك عليها
:D

الأربعاء، 21 يوليو 2010

ممكن؟




تعبانه..
ومخنوقه كمان..

عايزه أعيط..علي كتفك
ومش عايزه أتكلم عشان متضايقش عشاني..

مش فاهمه حاجه..
هي ليه الدنيا مستكتره عليا فرحتي بيك؟
أنا ف حاله معرفش هيا ايه
بتعصّب..
بتنرفز..

مُحبطه
وعايزه أبقي لوحدي..
الشخص الوحيد اللي ممكن يبقي معايا..انت
لأن انا وانت واحد..
خليك معايا


الاثنين، 12 يوليو 2010

هو..






لسه مش مصدقه إن في حد بالمواصفات دي..
طيب..طيب أوي..لدرجه إنه لما بيكشر بحس إنه طفل مش قد كل الزعل ده..ببقي عايزه أحضنه وأدلع فيه وأقوله هات اللي مضايقك وإنسي..خلي ضحكتك ترجع..ببصله أوي..بحتويه بعينيا..ونضحك سوا

لما بيضحك..بستغرب,ببقي عايزه أفهمه..,ضحكه راجل فاهم وعارف كل حاجه..بتخرج ببساطه حد عمره ما شاف الدنيا قبل كده..ولا يعرف أي حاجه فيها زي بنت صغيره ماسكه ف هدوم مامتها وبتستخبي فيها..

بيفقسني..فهم أنا قصدي إيه..بتكسف وأدور وشي بسرعه وأبقي عايزه أجري أستخبي منه..فيه.

ناضج..بيفهم إني متضايقه من حاجه من غير ما أقولها..بيبتسم ويعديها..يخليني أقولهاله بس من غير ما يزعل ويتقمص..دماغه كبيره فعلاً ومش بتاع حركات عبيطه..هو فاهم إني من حقي اتضايق..وبيسمحلي بده لدرجه تخليني حتي لو عندي سبب أتضايق عشانه..بنساه..!

أنساه؟ ساعات بشوفها ف عينيه,في حروفه,خليكي معايا..هو ميعرفش إن أنا اللي نفسي أقوله خليك معايا..هو دايماً علي بالي..وساعات بحس إنه..بيجري ف دمي..

دمي..في حاجه غريبه..ساعات بحس إننا قرايب..من عيله واحده..القرايب دايماً ليهم إحساس معين كده,حتي لو مش بتحبهم بتحس إن في مشاركه ..إنتماء.

وأهي دي كمان غريبه..أنا بقيت بنتمي لأفكاره بسرعه..بقتنع بيها..بتعجبني..ساعات بسأل نفسي يمكن ده عشان بحبه؟بس حتي لو مكنتش بحبه..بلاقيها داخله دماغي ومبرر قوي..عشان أحبه..وجداً كمان.

كمان..حاسه إنه معايا بيبقي حد تاني,,هو مع الناس ليه كلمه وقرار وصوت وغيره..معايا بحس إنه سايبلي نفسه خالص,,بتكسف..ده كتير عليا..هو حلم..بسيط

وهو نفسه بسيط..ملوش في عقد وكلاكيع اليومين دول,لا تناكه ولا غرور ولا كدب ولف ودوران ولا أي حاجه..بسيط لدرجه إني مصدقش غن في بني آدم كده..هو بس اللي كده..

الخميس، 10 يونيو 2010

جرح الغياب














كنت بسمع أغنيه بحبها
علي الحجار..متصدقيش

بيقول فيها "إزاي يطول جرح الغياب حد السما؟"
ممكن حد يجرحك بكلامه..بحركاته..بوجوده
لكن حد بيجرحك بغيابه؟
ممكن
ده اللي حسيت بيه
قد إيه التعبير مظبوط
جرح الغياب..
اللي يمكن يكون أصعب من الجرح العادي..
بيسيبك مع الأسئله اللي ملهاش إجابات
مع الوقت..إمتي هييجي..إمتي هيخلص الغياب
مع كل فكره وحشه وحلوه بتيجي ف بالك

ممكن حد يغيب عنك وانت ولا علي باله
ولا حتي يفكر يسأل ..
إنت عامل إيه وهو بعيد؟

!!
في ناس بتبقي مهمه عندنا أكتر مهي مهمه عند نفسها

زي ما كلامها بيجرح
ساعات السكوت بيوجع أكتر

متصدقيش..
http://www.mawaly.com/music/Ali+Elhagar/track/3438




الأربعاء، 2 يونيو 2010

بغير..

ممممممممممم
مش عارفه
بحاول أحط نفسي مكانك
هتتضايق ولا هتفرح؟
لما تعرف إني بغير
من حروفك..
اشمعني هي بتكتبها بإيديك
بتلمسك وانا لأ
بتفكر فيها
بتاخدك مني ولو للحظات

من كلامك,لو عن حد تاني,لو عن حاجه شاغلاك..بيبعدك عني وانت معايا
من أحلامك اللي مبشوفهاش معاك
من أفكارك اللي ممكن تعمل خلاف بيننا مش مقصود
من بطلات قصصك وتفاصيل حياتهم ..

من اللحظات اللي ممكن نبقي زعلانين فيها..
مش عايزاها تيجي..
ولما نتصالح وترجع تكمل تفكير..
من حاجه بتزعلك..ببقي عايزه آخد الزعل من جواك وأشيله عنك
من حاجه بتفرحك..هو في حاجه بتسعدك غيري؟؟

بغير من حاجاتك
من تليفونك لمايسمع صوتك من قريب
والانبوكس المليااااااان رسايل..
وساعتك لما بتبصلها وتركز فيها..
من هدومك اللي فيها من ريحتك
من أكله حلوه نفسك فيها..:D
ولا كوبايه شاي تعدل دماغك
من ميه بتغسل بيها وشك..بتفوقك
من نسمه هوا في عز الحر..تريحك
من بطانيه بتدفيك في ليل الشتا..
من أي حاجه أعرفها أو معرفهاش..
بقي عايزه أخبيك جوايا
أشيلك ف عينيا وأقفل عليك برموشي
مش كل دول ..أنا
خلاص..ينفع تبقي ليا لوحدي؟

أنغام..بغير..
وخلي بالك إني بغير من أنغام
:D

http://www.youtube.com/watch?v=lDbuE7ynA6M



السبت، 15 مايو 2010

أخدت نَفَسِي


تعرف..


انك أول حد يهزلي قلبي..
من فتره كبيره محستش الإحساس ده
يااااااااااااه


من أول مره سمعت صوتك..


من قبل ما أشوفك..


وبعد ما عرفتك..


فيك حاجه غريبه..


حاسه إني أخيراً خدت نفسي..
كنت بنهج
كنت قلقانه وحيرانه ومرتبكه وماشيه ببص حواليا
كنت بنام بنص عين..ونص عقل..وقلبي صاحي..
علي طول صاحي..
بيدق..بيدوّر..بيفكر..
راحه البال بالنسبالي كانت كلمه من لغه أجنبيه
وانا مش بتكلم غير عربي..
وبالعربي هقولك


كان بقالي سنين بدور عليك..


مش هتكسف


أول ما اشوفتك


زي ما أكون كنت تايهه وسط غربه وأخيراً لقيت حد أعرفه


كنت عايزه أترمي ف حضنك وأعيط أوي..


وبعدها أموت م الضحك وأفرح أوي لما ألمسك..أتأكد أنك حقيقي..


أخيراً لقيتك..

كنت واحشني أوي..أوي

الجمعة، 7 مايو 2010

شتا..

بردانه..
أو كأن الجو شتا..بس جوايا..
إحساس بأني عايزه أتدفي..
أطمن..
يمكن خايفه؟معرفش..
أو...
لأ..بلاش
محدش بيتدفي في الحر
مش الجو حر؟هنكدب؟
كل الناس حرّانه...
وأنا كمان..
بتضايق من الشمس السخنه أوي
من الجو اللي بيخلي الناس تغلي
من آشعتها المستفزه..
اللي مخليه كل العالم حرّان..
ومش قادره تدفيني..!

الجمعة، 30 أبريل 2010

نكته بايخه..

مره واحد قاللي انه بيحبني..بس قالي قدامه مشكله واحده..ايه؟ايه ؟ايه؟..مشكله بسيطه جدا..انه مرتبط بواحده تانيه..
أنا -طب هتسيبها؟
هو-لأ..
أنا-طب عايز ايه؟
هو-بحبكوا انتوا الاتنين..!!
أنا-بس البني ادم بيحب واحد بس..
هو-أصل الراجل ممكن يحب  4
أنا-قصدك ممكن يتجوز 4..لكن يحب 1 بس
انا-بس أنا مش اوبشن!


رفضت....قاللي خلاص نبقي أصحاب..مع اني معرفش يعني ايه اصحاب دي بس عادي يعني قولت زي زمايل الجامعه كده..لقيته بيسأل ومهتم وعايز يعرف كل تفاصيل حياتي..ولما رفضت تاني علي أساس انها خصوصياتي.. بعدها بشويه مسح نفسه من الفريندس ولما سألته قاللي " انتي اللي غلطانه"..ههههههههههههههه تصدق فعلا!



مممممممم..أه بفكر عادي يعني..في حاجات لما بتحصل ..بتبقي شبه النكت اللي بنسمعها من أصحابنا وبنقراها ع النت وكده يعني..بس المشكله ان في الحقيقه  بتبقي نكته..بايخه

الأحد، 25 أبريل 2010

مليت من الأعذار..

زهقت ..
من الأعذار..
من الإعتذار..
الاتنين واحد..
ممكن تعذر واحد ف تسامحه
وممكن حد يعتذرلك ف تسامحه برضو..
مزهقتش من التسامح
بس متضايقه من الناس اللي تدوس علي كل حاجه
وتيجي ترميلك كلمه..آسف..
قد إيه الكلمه دي بتبقي حلوه لما بتتقال ف وقتها..بإحساسها..
آسف إني زعلتك..مش معناها حاجه وحشه..
معناها مش  عايزك تزعل مني عشان انت غالي..
في حد يبقي غالي..وترميه؟؟!!

مره حد قاللي من فتره
علي فكره انتي عبيطه اوي
انا لو مكانك كنت عملت وسويت كذا وكذا وكذا..
إزاي تسيبي حقك؟
إزاي معرفش ايه..شويه الكلام بتاع التسخين ده..


لما فكرت فيها  لقيت إنها أسهل حاجه ف الدنيا
وأصعب حاجه ف الدنيا إنك تكبّر وتفوت
وتعدي وتقول معلش بكره يحس..
وحتي من غير ما يعتذر..تقول غلط صغير ومفيش فرق بيننا
يمكن لما يغلط ف حقي واسامح المره الجايه ياخد باله
مره واتنين وتلاته و100

بس الناس بتفهم بالعكس..
مبقتش بتعتذر..
وحتي لو بتعتذر ف سكوتها أحسن..
مليت من الأعذار..
مليت من معلش وعشان خاطري والمره دي بس وكل الكلام ده..

مليت من ناس..مبتحسش..








الخميس، 22 أبريل 2010

حتي المكان بيناديك..

امبارح كنت ف مكان قريب منك..
قريب ف ذكرياتك..ف صوتك..ف مكانك..
مقدرتش أقرب..
كنت بحاول بكل ما فيّا إني أهرب..
علي فين..معرفش..
يمكن بهرب منك لأنك لسه جوايا؟؟
أو جايز ببعد عنك عشان انتهت الحكايه..
كل حاجه هناك كانت بتناديني 
حتي وشوش الناس كانت عليها صورتك..


تصدق..شوفت واحد شبهك
كنت بحسبه إنت..
فرحت..وطلعت للسما ف ثانيه..
مع إن لو إنت مكنتش هسلم..
أحنا مبقاش في بيننا حتي سلام..


كان ماسك ف إيده بنت..
خطيبته..حبيبته..او يمكن حاجه تانيه..
عملت نفسي بضحك وانا من جوايا..بتألم..
ولقيتني بصرخ لكن..من غير كلام ..


كان معايا اصحابي..خفت أعيط قدامهم وأبان علي حقيقتي..
مع إنهم أول ناس بيقفوا جنبي ف وقت ضيقتي..
عارف..قعدت اقولهم هوه..
نفس مشيته..
نفس شكله من بعيد
نفس الغرور اللي ف نظرته
بس مش نفس البنت اللي ف الايد

مش عارفه ده بقي زعل..ولا دي غيره
بس انا من يوم ما عرفتك مش سايباني الحيره
عايزه حل..
اقولك علي حاجه..
مش هروح هناك تاني
بس تفتكر دي طريقه عشان انساك..زي مانت بتنساني؟



الاثنين، 19 أبريل 2010

بحبهم..

عندي شويه اصحاب ربنا يخليهم بجد
جدعان جدا..طيبين اوي..دمهم خفيف موت..
شويه بنات الواحده فيهم ب 100 راجل
لاخليهم 150
بحب شقاوتهم..رخامتهم..عنادهم..وحبهم لبعض..
أول حد بلاقيه واقف معايا ف أي وقت وف أي موقف..


بسنت وذكريات أربع سنين كليه..من أول تيرم وأول لجنه وأول سيكشن مع بعض..أول تدريب..أول خناقه..أول محاضره..أول أصحاب مشتركين..أول واحده كانت بتروح بين المحاضرات..وأول واحده راحت اشتغلت ف المسرح وبقت ترجع بالليل متأخر..أول واحده تشوفها بتضحك تروح ضاحك من غير ما تعرف ليه..أول واحده تقريبا بتحب عسيلي وحسام غالي..أول واحده ف اخواتها..أول كل حاجه مع بعض..


ياسو ..جيسي..يعني هواره..وذئاب الجبل ذئب ذئب..البت دي طيبه طيبه الابل..وحنينه حنيه الابل..يعني الارجنتين الشقيقه وكل حاجه لما بتحصلنا احنا الاتنين زي بعض بالظبط..يووووووووووه أممكن


مي..ورغم كل الصورالclose  اللي بتصورهالنا ..بس جدعه جدا مي من الناس اللي من الوهله الاولي تعتقد ان ملهاش غير ف المحاضرات وبس..بعد كده بتكتشف ان ليها ف كل حاجه الا المحاضرات..:D
 اخر واحده تنزل من لجنه الامتحان..ومعندهخاش غير رد واحد علي كل الاسئله..طيب طيب طيب


ساره اللي بتفتح كاميرا الموبايل اللي قدام وتقعد تصورنا صور عجيبه واحنا ف السيكشن..ولما الدكتور تاخد بالها تروح تبصلي انا وساره تعمل من بنها..واحنا نازلين من نفس السيكشن تلاقي واحده بتقول..يارب نقع كلنا..
رغم كل مقالب ساره وخفه دمها..إلا انها بتحس..ساعات بحس ان البت دي من كتر ما بتحس مش بتحب تبين..الله اعلم 

هوباااااااا..هبه ..يعني الجدعان اوي..يعني ولاد البلد اوي..يعني الناس الجامدين جدا..يعني أول حد تلاقيه واقف جنبك بكل جدعنه من غير ما تعرف ليه..يعني الكرامه....يعني الدماغ الجامده اللي مبتعرفش تطلع حاجات ع الورق ..يعني الضحكه اللي بتطلع روحها ..يعني حاجات كتير اوي..والناس الحلوه اللي قاعدين في الفرح..




غاده..غادت..ولأنها غادت..خلت مصر كلها تقولي يا بسمت..تستمتع بالرخامه..تستمتع بالرخامه..لأ وغير كده..تستمتع بالرخامه

روغا..رغده..الصحفيه اللي بتتشعلق ف أي مكان ولا بيهمها..البت اللي تعرفها من صوتها لو وسط ألف حد..البت اللي كل ما اشوفها افتكر محمد هنيدي..العفريت جاب الطول ده كله منييييييييييييييين؟؟


أنجل..أو اسماء..لسه عارفاها قريب مع اني كنت عارفاها من زمان ..بس اول مره نتكلم قريب..شكلها هتنضم للأرجنتين..البت دي بتحس..ومن الناس اللي احساسها بيتعبها..بس اكيد الاحساس ف حد ذاته متعه..


داليا اللي كل ما اشوفها تقولي مبتسأليش ليه..ولما أسأل غالبا بيطلع في ماتش وتقولي جيتي ف وقت غلط..طب أعمل ايه هي كل حياتها النادي الاهلي..وانا اهلاويه اه بس مش إدمان يعني..علي قد ما بتخنق من ان اهتماماتها كوره ..بس متأكده انها ممكن تعمل بيها حاجه مميزه..





علياء..لول..جدعه جدا بس محتاجه تركز..في ايه معرفش بس تركز وخلاص..مبشوفهاش غير ف استاتيوهات..يا ع الاهلي يا تريكه ..ليه متعملش رابطه هي وداليا وخلاص؟


رنا..جدعه جدعه جدعه..وطيبه طيبه الابل..غير انها الراعي الرسمي للإبل في المنطقه..تعتبر أرق واحده فينا..معرفش ايه اللي جابها معانا بصراحه بس أهي بدأت يبان عليها علامات شراسه وبقت بترخم زينا
:D
أسمو..هاديه..رقيقه..بتحب..بجد




دينا..كل ما اشوفها بفتكر اغنيه ابو الليف اللي ساره بتسمعهالي غصب واقتدار..الاخت الفاضله اللي اختارتها علشان تتجوزني..في حد موقع بيننا في حد ممهمزني..لالا..صوت البنت بقي اللي ف الاول وطريقه كلامها
:D


ولاء ..يعني بنت المنطقه..ولود البلد..بتحبني معرفش ليه لله ف لله..وانا كمان بحبها معرفش ليه..غالبا الدم بيحن..لينا شويه مواقف مع بعض عسل بالذات واحنا مروحين ومش لاقيين مواصلات..بناخد بهدله للصبح..






ربنا يخليكوا ليا يارب ونفضل أصحاب علي طول
:)





الثلاثاء، 13 أبريل 2010

إبعدي..












الكلام ده لواحده مني قريبه
حنينه..رقيقه..طيبه ..
مش شرط هي مين..
مش لازم هي فين
مش لازم اسمها وعنوانها..
انا بديل ليها وانا هنا مكانها
عارفه انها بتحبني
اقرب حد ف وقت ضعفي..
بتشدني..
عشان في بيننا كتير من التشابهات
وكل حكايه بتتعاد بنفس المقاسات
خايفه عليكي من اللي بيا
مش هتستحملي اللي بيجرا ليا
أي جرح هاخده انا مكانك
وتفضليلي انتي تطبطبي عليا..
خليكي جوايا مستخبيه
زي ضهر العُمله ..متداريه
مش هتبقي عكسي..
انا عايزاكي ف صفّي..
تبقي زي مرايه ليا

عشان بحبك..إبعدي



الاثنين، 22 مارس 2010

مش عارفه بقي

مخنوقه اوي من امبارح
حاولت افضفض مش عارفه
جيت انزل الكليه مليش مزاج
هو في ايه بقي
ايه الدنيا دي
لما ببقي فايقه بعرف أرد عليكي وأنفض لاي حاجه تضايقني
ولما ابقي مش فايقه بتلكك و بجيب كل حاجه بتضايقني
عندي حاله غريبه..
صدمه مش عايزه تطلع..
او هي اصلا مش صدمه..
او انا كنت عارفه انها هتيجي ...
او عشان جت فعلا..
او عشان جت وخلصت بسرعه
مش عارفه بقي
اول مره ابقي مش عايزه اكتب ولا اعمل اي حاجه
قاعده بسمع ميوزيك وخلاص..نكد طبعا..
ونفسي اروح اي حته فيها بحر ضروووووووري

الأربعاء، 10 مارس 2010

محتاجه فراااااااغ

كالعاده احساس عجيب
بس المره دي مش وحده
محتاجه للفراغ..
ان يكون في جزء فاضي ف حياتي 
عايزه صفحه بيضا ف ضهر الكشكول اشخبط عليها
طب بلاش دي لحسن تكون صعبه
عايزه اروح مكان فاضي
اسمع فيه صدي صوت
جزيره..بحر
ايوووووه بحر
بقالي فتره بحلم بيه
بيناديني 
هو الوحيد اللي بيظبط معدل الفراغ جوايا



الثلاثاء، 2 مارس 2010

عايزه اشخبط



 










عندي احساس غريب 
عايزه اجيب ورقه بيضا كبيره واقعد اشخبط عليها
الاول لون اسود معرفش ليه
وبعدين احمر
وبعدين ازرق


وبعدين هتضايق من الشخبطه ومنظر الورقه المنكوش
هحولها للوحه معرفش ازاي
المهم اني هطلع اللي جوايا ف شكل لوحه..
ودي حاجه بتضايقني ساعات

امبارح كنت قاعده بشخبط ف ورقه
قلبت معايا برسمه
وبدل ما اشخبط عليها قعدت ظللتها وبقي شكلها غريب
زي اللوحات النضيفه بالظبط
وانا مش عايزاها كده
انا عايزاهاملهاش ملامح
عايزه ايدي تتحرك علي الورقه بعنف من اولها لاخرها
وترجع تصلح الشخبطه بلون رقيق
هشخبط بيه برضو 
بس ف الاخر تبقي اللوحه ملخبطه
كل الالوان
وكل الاحاسيس
زي حالتي بالظبط


يووووووووه
عايزه اشخبط بجد
 لوحه هتبقي كلها شخبطه
دي حريه تعبير برضو
ان المشاعر تخرج بشكل فوضوي
عفوي
ثائر احيانا
لكن مش مهم
المهم انها تخرج
لو قعدت جوايا مضمنش ايه اللي هيحصل
انا بحذرني اهو..
هقوم اجيب ورقه احسن
بس يارب اعرف اشخبط

الجمعة، 19 فبراير 2010

مرهقه..

عندي حاله غريبه
احساس بأن الكون كله ضدي
مش كله اوي يعني ..
بس اهم ناس في حياتي..
أهمهم..!!
مش هم في حد ذاتهم..
لا الظروف اللي بتمنع حد عن التاني
ليه وازاي..معرفش..

كل اللي اعرفه ان قوي الطبيعه بتشدني بشكل غريب
عشان ابعد عن كل حاجه
والواقع ف نفس الوقت بيدفعني للتواجد بشكل اغرب
التناقض بين الاتنين عامللي ارهاق 

عندي احاسيس كتير عكس بعض
احساس باني عايزه اكسر كل الفوضي دي
واحساس اكبر اني عايزه اختفي..



الثلاثاء، 16 فبراير 2010

أرق..

 












هي الفكره اللي مش بتخلي الواحد ينام دي نوعها ايه؟؟
فكره صعبه؟
ولا مجرد لعبه؟


حاجه متعبه؟؟
مؤنبه؟؟؟


جميييييله؟؟
ومن كتر جمالها صعب تغمض عينيك؟؟


غامضه وغموضها يدوخ؟؟
ولاذكري تسّهر وتجرح؟؟
حاجه ممسوكه..؟
محسوسه؟؟
ايه الفكره اللي تطير النوم من عينيك؟
ايه الفكره اللي بتنتصر علي قوي الطبيعه
ايه اللي ينسي الجسم ان دلوقتي معاد نومه..
تخليه يتجاهل تعب اليوم..
وتقرر بكل قوه..
انه لازم يسهر
ويفكر
ويستحمل تعب اضافي...
مجرد التفكير في نوع الفكره وتفاصيلها
هو في حد ذاته فكره..
دعوه للمزيد من الارق..





الاثنين، 15 فبراير 2010

صوت من دهب..


الجميله لينا شاماميان..
سمعتها مره..ومن مره كانت كفايه اوي اني احبها ..

بالي معاك : الأغنية الدمشقية المعروفة , والتي تعد جزءاً من مكونات التراث الدمشقي , قدمت هذه المرة بأسلوب مختلف ووبتوزيع موسيقي ساحر

بالي معاك
بالي بالي
بــالي
يا أبو الجبين
عالي عالي
عــالي
وحياة سواد عينك يا حبيبي
غيرك ما يحلالي
غيرك ما يحلالي
***
عمري ما راح يرتاح يا حبيبي
والشوق بقلبي يقيد
فكري معاك نوّر يا حبيبي
غيرك ما يحلالي
غيرك ما يحلالي
***
القلب لو قال آه يا حبيب
آهاتو تكويني
أنت بقى الدنيا يا حبيبي
بقربك حتحلالي
بقربك حتحلالي
***
بالي معاك
بالي بالي بالي
بــالي
يا أبو الجبين
عالي عالي عالي
عــالي
وحياةسواد عينك يا حبييي
غيرك ما يحلالي
غيرك ما يحلالي

صوت ساحر..ساحر بمعني الكلمه..
غير جمال الصوت اللي بيخرج كأنه موجه من الكلمات الرقيقه 
في جمال الاحساس..
والذوق الراقي ..
اول صوت بحس انه بيعبر عن بالبحر بجد
في قوته..في  لونه الازرق..في غموضه..في بساطته وجاذبيته..

يا محلى الفسحة يا عيني
على رأس البر
والقمر نوّر عيني
عيني عيني
على موج البحر
***
قلي تعـالي
يا شــاغلة بالي
كوني حلالي
على طول العمر
والقمر نّور
عيني
عيني عيني
على موـ
على موج البحر
***
يا محلى الفسحة يا عيني
على رأس البر
والقمر نّوّر عيني
عيني عيني
على موج البحر
أصل المحبّة
ضحكة ولعبـة
خلينا صحبة يا عيني
على
طول العمر
والقمر نوّر عيني
عيني عيني
على موـ
على موج البحر
----------------------
*النغمه الخفيفه..الرقيقه..
والصوت الشامي الاصيل
عالروزنــا
عالروزنا عالروزنا..كل الهنا فيـها
شو عملت الروزنا..الله يجازيها
عالروزنا عالروزنا..كل الهنا فيها
شو عملت الروزنا..الله يجازيها
يا رايحين لحلب..حبي معاكن راح
يا محملين العنب..تحت العنب تفاح
كل من وليفو معو..وانا وليفي راح
يا ربي نسمة هوا..ترد الولف ليا
عالروزنا عالروزنا..كل الهنا فيها
شو عملت الروزنا..الله يجازيها
***
يا رايحين عحما..خفولي نيتكم
تلتين عقلي شرد بهوا بنيتكم
حلفتكم بالبرد ومنين ميتكم
ميتنا عاصي حما..شرب الافنديا
عالروزنا عالروزنا..كل الهنا فيها
شو عملت الروزنا..الله يجازيها


الفرحه...
الجو القروي في الشام
في اغنيه قبل العشا
فلكلور شامي ..جميييييييييل 
أغنية تغنى في الأعراس , في قرية تقع في الشمال الغربي من سوريا اسمها الجديدة , الأغنية غير معروفة سوى في تلك القرية.

قبل العشا لا يا سيدي وبعد العشا ايه وايه
مع مين ومع مين ارسلك سلام مع مين
يامهجة العين ويا كبد الحشا مع مين

يا برق سلم عليهم كل ما تلمع
كنتو بعيدين و باخبار إلكم نسمع
صرت قريبين وما تطليع ما نشبع

ما موت وما موت ولو جابو الكفن ما موت
لانزل عسوق الطويل وفصل التابوت
مسمار من فضة ودهب ومسمار من ياقوت
وتتعجب المسكونة و تنين بالتابوت

بداركم مشمشة وبدارنا خوخة
يا شجرة المشمشة مالت على الخوخة
حاجي تروح وتجي من تحت هالطاقة
يا رب رشقة مطر والأرض مشتاقة

يما لالا :أغنية شعبية معروفة كثيراً وقدمت كثيراً بتوزيعات مختلفة وقدمتها لينا وباسل بشكل فريد ورائع
  
يما لا لا ولا لا يا لا لا لا وايش بدك مني يا خالة
ايش بدك من يا خالة وايش بدك مني يا خالة
بحياتك خليني بحالي وخلي الحلوة بحالها
وخلي الحلوة بحالها وخلي الحلوة بحالها

يما لا لا لا تخليني احن دايما على بالي بتعن
يما لا لا لا تخليني احن دايما على بالي بتعن
هالحلوة خلتني أجن
عيونها عيون الغزالة
عيونها عيون الغزالة
يما لا
يما خلي الحلوة لأهلها تمشي وتسرح ع مهلها
يمااااااااااااااااه
ما شفنا منها أحلى
هالحلوة زادت دلالها
هالحلوة زادت دلالها 

يما لا

شرقيه...بانغامها الشرقيه..


لما بدا يتثنى لما بدا يتثنى
حبي جماله فتنا
أمر ما بلحظة أسرنا
حسن ثنى حينما
وعدي ويا حيرتي وعدي ويا حيرتي
من لي رحيم شكوتي
في الحب من لوعتي
إلا مليك الجمال
أمان أمان أمان أمان

أنشودة الآلــــم الرائعه
رقصة الحزن ..
 دعوني اجود..
دعوني أجود : أغنية كانت تغنى ليلة الجمعة الحزينة , قدمت بأسلوب فريد وساحر وتدل على التعايش الديني الموجود في سوريا , أهدتها لينا لكل الشهداء في العالم.
 
دعوني أجود بالبكاء على وحيدي وحدي
فانهمري يا دموع عيني وأثري في كبدي
فؤادي انتكوى على الحبيب وخانني جلدي
وحيدي قضى وحيدي الحبيب فتفطري يا كبدي



شآم : هواجس فتاة تحب هذه البلاد , أسلوب فريد ولا يتكرر البتة !! الأغنية من كلمات لينا شماميان وموسيقى باسل رجوب

فتاة صغيرة بعمر القدر سموت بها عن قلوب البشر
وراحت عيوني لمراَها تعلو أسبح مبدعها فيم صور
فها قطعة من رخام تعشق رائحة الياسمين فأزهر
جوري وريحان. من مسك وعنبر فاح بصرح تلون أخضر
علاه هلال وزان حلاه أذان باسم الخلاقك كبر
زاد دقات الأجراس عيدا نداء صلاة بها الروح تطهر
فتعبق بالبخور مطارح يحنو بها كل قلب تحجر
شاَم أنت فتاتي وأمي حضنت صباي فهل فيك أكبر
فما أفعل كي أنال رضاك وفيك بذرت صباي وأبشر
فهل من يزغرد ويعلي نداء لفرحة قلب بجرح تخمر
هو وعد دهري فيا ليت قبري وفستان عرسي بفلك يعمر
شآآآآآآآآآآآآآآآآم


الأربعاء، 10 فبراير 2010

في عشق الكتابه..فجرا














بحب الكتابه وقت الفجر
معرفش ليه
يمكن عشان ده اللحظه اللي بحس فيها بنضافه الكون!
او الوقت اللي الدنيا كلها بتبقي زي مولود جديد..
طاهر..
نقي..
مغمض عينيه..
والناس كمان مغمضين عينيهم..
مش عارفه بقي ده نوع من السلام النفسي
ولا نوع من اللا مبالاه بالنسبه ليهم..
طب وانا؟
بكتب الفجر عشان اهرب منهم؟
ولا عشان استمتع بالهدوء من غيرهم؟
غالبا الهدوء..
الناس مزعجين..
بيقولك وتقوله ويتكلموا علي بعض
كائنات حشريه
فيها ايه لو كل واحد يخليه ف حاله
يراعي شعور الاخر من غير ما يجرحه
الكتابه ف الفجر ليها طعم تاني
يمكن لانها صوت بيطلع ف وسط سكون الكون..!
يمكن لانها فضفضه جسد مرهق طول اليوم ومنامش
يمكن لان الفضفضه ده واقعيه..
يمكن لاني مرهقه مش بفكر بكتب ايه عشان كده بيكون طبيعي
يمكن لان الكلام ف والوقت ده بيطلع طبيعي ومش متزوق
يمكن صلاه الفجر تريحني
يمكن بدأ صفحه جديده مع نفسي..
يمكن براجع صفحتي اللي فاتت
يمكن بحاول اوصف اول خيط من خيوط النور 
اخليه ف شكل حاجه ماديه
ملموسه
محسوسه..
او مكتوبه ..
يمكن سايبه كل ده وبرغي لمجرد اني مش لاقيه حد اكلمه الساعادي
يمكن مستمتعه اني بشوف كلامي ف شكل حروف
يمكن بحب جديد وخايفه اقول..
اكيد بحب..
اكتب وقت الفجر
:)

الثلاثاء، 9 فبراير 2010

صرخه مكتومه..

ساعات بحب اعذب نفسي..
عارف لما تبقي عارف ان الحاجه ده بتوجعك
وتدوس عليها بكل مافيك من قوه..
مش عشان توجعك
عشان الوجع ده يفكرك انك متعملش كده تاني
تفتكر سببه وتكره كل الالم اللي عملهولك
بتصحي جرح قديم عشان ميكونش سبب ف جرح جديد

صرخه مكتومه..
محبوبه..
مسموعه داخليا بس
مفيش مانع من تكرار فتح الجرح كذا مره
كل ما ينشف ويبقي يادوب قرب يخف
بدوس عليه تاني
يفتح تاني
الالم القديم اللي شوفته ودقته واتعودت عليه
اكيد ارحم من جرح جديد..
 الجرح القديم مش بيتعالج لاني بصحيه..
طب والجرح للي لسه مجاش..
بموته من قبل ما ييجي

نقوش ..

معلمه اوي جوه الذاكره
مش  سهل انها تتمسح
احيانا بنحاول نداريها..
وساعات بنتباهي بيها..
مش اي حد بنوريهاله
ومش اي حد بيقدر يشوفها

وجع..
احساس بالالم الداخلي
نغزه مفاجأه
  توجع ف القلب وتختفي
مش ازمه قلبيه..
ولا ازميه عاطفيه..
دي جروح عميقه..
جوانيه ..
منقوشه علي القلب

السبت، 23 يناير 2010

اخت القمر..

مين يقدر ميحبهاش؟؟
مين يقدر يمنع عينيه من انها تبص لجمالها
مش مجرد جمال شكل او ملامح
جمال الروح والضحكه المنوره
العينين اللي فيها حزن وفرحه ..
الطفله الشقيه جدا
البنت المراهقه بافكارها الطايشه المجنونه..
الانسه الشيك الجميله اللي زي الورده اللي كل شاب بيحلم يقطفها..
الصديقه اللي تتمني تتكلم معاها
الابنه اللي بتحب بيتها وتشارك فيه
الاخت الجدعه اللي تلاقيها وقت الشده
المرأه القويه اللي تقف قدام اي حاجه وميهمهاش..
الانوثه الطبيعيه اللي يضعف امامها اي حد
وتخلي الستات يحبوها قبل الرجاله

الصوت  الحنين كأنه اغنيه عاطفيه جميله
الام اللي ممكن تعمل اي حاجه عشان ولادها..
مش مهم كانت بتمثل حلال او حرام
مش مهم هي مين وكانت ايه..
المهم انها فعلا قدرت توصل كل ده
يبقي اكيد هي فعلا بني ادمه جميله..
الله يرحمها
سعاد حسني ..

الجمعة، 22 يناير 2010

6 الصبــــــــــــــــــح


هدوء بعد صلاه الفجر
السلام الكوني..
مزيكا هاديه من صوت الاذان
واحلي كلام تسمعه من القران ..

احساس بالراحه بعد الصلاه
وشعور بنضاره من الوضوء..
اصوات تسبيح الكون
مع صوت الشجر

وزقزقه العصافير اللي بتصحي بدري

الجو المليان بقطرات الندي..
نفس ريحه جذع الشجره المبلول من المطره
وريحه الشوارع المغسوله بعد ليل طويل
والحركه القليله ف الحواري الضيقه
القمر اللي ظاهر مكسوف ف السما قبل ما يمشي
والشمس بدأت تظهر عشان تيجي تنور الدنيا

كل حاجه ف الكون نقيه..
كأن كل الذنوب اتمسحت
والارض استعدت لاستقبال يوم جديد..
الساعه 6 الصبح ..

الأربعاء، 20 يناير 2010

محتاجالك..



فرحه..



قبل ما يجري ..هكتب عنه
هاخد نسخه لنفسي منه

احساس بالفرحه بييجي ساعات
بيكون من اجمل لحظات..

عايزه اكتبه..اوصفه..واشوفه
كلام بيرقص بحروفه ..

الفرحه شعور مش مشهور
في عز الليل بتلاقي النور

بيخليني ابص لبكره
بيكبّر ف دماغي 100 فكره

مهما حصل ف الدنيا ويجرَي
كانت في فرحه ف عمري..ذكري




وجع دماغ!


صداااااااااااع









عندي صداع رخم
انا كائن مبيبطلش تفكير..
المشكله مش ف التفكير
المشكله في اللي بفكر فيه
حاسه اني فكر ف حاجات زي الدواير كده
واحده جوه واحده..واحده جنب واحده
المهم ان ملهاش اول من اخر
اجيلها من هنا..تجيلي من هنا
الف م الناحيه التانيه.,.الاقيها بقت دايره جديده خالص
اسيب المشكله وافكر ف الدواير
ضميري يأنبني
اسيب الدواير وارجع للمشكله
الاقي الدايره الكبيره خالص الاولانيه كبرت اكتر
بقت مشكله وجواها دواير
افكر ف المشكله ولا افكر ف الدواير؟
طب افكر ف الدايره الكبيره ولا الصغيره؟
لو فكرت ف الكبيره الصغيره هتزعل والعكس
طب اسيب الاتنين دول واروح للعكس
كده بقوا دايره كبيره جواها مشكله ودواير صغيره والعكس..
هي الحاجات بتكتر ليه؟
انا عايزه احلها مش اعقدها..
هي كده اتعقدت ولا اتحلت؟
طب مهوده كمان سؤال..
كده بقوا دايره كبيره جواهامشكله و دواير صغيره والعكس وسؤال..
الله..ده بيزيديوا!
وده وقت استغراب
هو انا عايزه احل ولا اقعد؟
احلها طبعا..اللي هيا ايه؟
هو انا نسيت؟ولا بهرب منها؟
يعني دايره كبيره جواها مشكله ودواير صغيره وسؤال والعكس وحته لحاجه نسيتها
الدايره الكبيره بتوسع وبتحتوي كل الحاجات
هي الدايره ده ايه استيك ولا بلاستيك؟
يعني انا دلوقتي عندي دايره كبيره ومشكله ودواير صغيره وسؤال والعكس وااختيار مابين استيك وبلاستيك
وممكن افضل كده 3 ايام قدام
شوفت بعمل ايه ف دماغي عشان مفكرش فيك؟

الثلاثاء، 19 يناير 2010

من غير صوت..












عندي احساس غريب من امبارح..

الدنيا فاضيه بشكل مش طبيعي..
مع انها ف الواقع مش فاضيه خالص
مذاكره وامتحانات و500 حاجه غيرهم
عندي احساس بالفراغ الداخلي..
مش فراغ عاطفي..لا داخلي
ممممممممممم
عارف لما تكون زي كتف كده الناس بتتسند عليه
بيبقي مش مسموحلك تضعف او تقصّر
مش مسموح انك تبعد او تكشر
مش مسموح انك لوحدك تقرر
بس مسموح انك تفكر
مين اللي بيسمح ولا ميسمحش؟
هم؟؟اللي ساندين عليك؟
بالعكس..هم عمرهم ما قالوا ولا هيقولوا كده
بس وجودك وسطهم عشان عارف هم بيحبوك قد ايه
هو اللي مخليك مش عايز تضعف عشانهم
عشان يلاقوا حد يتسندوا عليه..
اكيد في غيرك بدل الواحد مليون
بس من كتر حبك ليهم خايف عليهم من اي حد..
ده بالنسبه ليهم هم..
وبالنسبالك من جوه..زي ماتكون شايل الدنيا كلها فوق كتافك
ده غير مشاكلك انت بقي..
احساس انك واقف لوحدك وحش اوي
واحساس انهم ساندين عليك..ساعات بيفرحك
وساعات بخليك تفكر بدل المره الف انك تسيبهم..
لمصلحتهم..
اللي تاعبك مش الدنيا..ولا المشاكل ولا اللي ساندين عليك
اللي تاعبك انك لوحدك..ومش لاقي كتف تريح عليه شويه
عشان تقدر تكمل ...
هو ده الاحساس اللي عندي
كل مايجيلي بدخل ف مود غريب..
ببقي عايزه اصرخ بصوت واطي
واقول ياااااااااااااااااارب من غير ماحد يسمعني غير ربنا
من غير صوت بس الكلام مسموع..
هو اللي عارف ضعفي
يارب قويني ....
محتاجالك اوي اوي اوي..

محتاره..










محتاره ومش جايلي نوم..
وانا من امتي بنام اصلا..
الكلمه ده اتلغت من عندي من زماااااان
الدنيا بقت غريبه اوي

اول حاجه حد بيفكر فيها ازاي يستفيد منك؟
ازاي ينفذ مصلحته حتي لو علي حساب حد تاني؟
تروح مع ده..تبقي ضد التاني

ولو رحت مع التاني..تبقي ضد ده
وانا اصلا مش عايزه ابقي مع او ضد

مش فكره موقف معين اتجاه حاجه
اكيد ليا موقف وليا رأيي

بس هو لو شخص ضدي لازم يبقي عدوّي؟؟
واحنا ليه بنحاسب البشر ماللي خلقهم هيحاسبهم..
مانحاسب نفسنا اولي..

ناس كتير اوي بقت ماشيه بقانون المصالح
ولو رفضت ..تبقي عبيط

ولو قبلت هتبقي زيهم!

المصلحه مش عيب

العيب اني ابني سعادتي علي حساب حد تاني

عيب وحرام وقله ضمير وحاجات كتير اوي..
من ورا قلبي كتبت الكلام ده عشان الدنيا مش عاجباني

وانا عارفه انه هيقولي بالراحه عليهم دول بشر
هم فعلا بقوا جنس بشري
ملوش علاقه بقي بالانسانيه والكلام الفارغ ده

مش ده الدنيا اللي كنت بحلم بيها
ولو سألت اي حد هيقولي
اصل هم ولاد كذا وكذا وهم كدابين وهم نصابين وهم وهم
وهم دول مين؟؟مش احنا..انا وانت وناس كتير اوي
ولا في ناس تانيه معانا علي الكوكب؟
مش هشيل نفسي منهم..
وانا اول واحده بحاسب نفسي
يمكن انا كده ف نظر حد معرفوش
مش هستني لما يقولي كده ف وشي..
دايما بفتكر ان في ربنا ..
هو اكبر من كل الناس ده
من كل البلد ده..
ربنا اكبر..
في الاذان..الله اكبر
اكبر وبس..عشان هو فعلا اكبر من اي حاجه لانه خالق كل حاجه
والناس اللي بتمثل وتكدب وتنصب
واييييييه كل ده
عشان ايه يعني ؟
والله ماهي مستاهله

محدش واخد منها حاجه