الخميس، 22 أبريل، 2010

حتي المكان بيناديك..

امبارح كنت ف مكان قريب منك..
قريب ف ذكرياتك..ف صوتك..ف مكانك..
مقدرتش أقرب..
كنت بحاول بكل ما فيّا إني أهرب..
علي فين..معرفش..
يمكن بهرب منك لأنك لسه جوايا؟؟
أو جايز ببعد عنك عشان انتهت الحكايه..
كل حاجه هناك كانت بتناديني 
حتي وشوش الناس كانت عليها صورتك..


تصدق..شوفت واحد شبهك
كنت بحسبه إنت..
فرحت..وطلعت للسما ف ثانيه..
مع إن لو إنت مكنتش هسلم..
أحنا مبقاش في بيننا حتي سلام..


كان ماسك ف إيده بنت..
خطيبته..حبيبته..او يمكن حاجه تانيه..
عملت نفسي بضحك وانا من جوايا..بتألم..
ولقيتني بصرخ لكن..من غير كلام ..


كان معايا اصحابي..خفت أعيط قدامهم وأبان علي حقيقتي..
مع إنهم أول ناس بيقفوا جنبي ف وقت ضيقتي..
عارف..قعدت اقولهم هوه..
نفس مشيته..
نفس شكله من بعيد
نفس الغرور اللي ف نظرته
بس مش نفس البنت اللي ف الايد

مش عارفه ده بقي زعل..ولا دي غيره
بس انا من يوم ما عرفتك مش سايباني الحيره
عايزه حل..
اقولك علي حاجه..
مش هروح هناك تاني
بس تفتكر دي طريقه عشان انساك..زي مانت بتنساني؟



هناك تعليقان (2):

  1. لا طبعا روحى والمرة الجاية هنمشى بقى فى نفس الش........


    بجد حلوة اوى
    :)

    ردحذف
  2. تباً لكي يا باسنت
    :))

    ردحذف