الاثنين، 12 يوليو، 2010

هو..






لسه مش مصدقه إن في حد بالمواصفات دي..
طيب..طيب أوي..لدرجه إنه لما بيكشر بحس إنه طفل مش قد كل الزعل ده..ببقي عايزه أحضنه وأدلع فيه وأقوله هات اللي مضايقك وإنسي..خلي ضحكتك ترجع..ببصله أوي..بحتويه بعينيا..ونضحك سوا

لما بيضحك..بستغرب,ببقي عايزه أفهمه..,ضحكه راجل فاهم وعارف كل حاجه..بتخرج ببساطه حد عمره ما شاف الدنيا قبل كده..ولا يعرف أي حاجه فيها زي بنت صغيره ماسكه ف هدوم مامتها وبتستخبي فيها..

بيفقسني..فهم أنا قصدي إيه..بتكسف وأدور وشي بسرعه وأبقي عايزه أجري أستخبي منه..فيه.

ناضج..بيفهم إني متضايقه من حاجه من غير ما أقولها..بيبتسم ويعديها..يخليني أقولهاله بس من غير ما يزعل ويتقمص..دماغه كبيره فعلاً ومش بتاع حركات عبيطه..هو فاهم إني من حقي اتضايق..وبيسمحلي بده لدرجه تخليني حتي لو عندي سبب أتضايق عشانه..بنساه..!

أنساه؟ ساعات بشوفها ف عينيه,في حروفه,خليكي معايا..هو ميعرفش إن أنا اللي نفسي أقوله خليك معايا..هو دايماً علي بالي..وساعات بحس إنه..بيجري ف دمي..

دمي..في حاجه غريبه..ساعات بحس إننا قرايب..من عيله واحده..القرايب دايماً ليهم إحساس معين كده,حتي لو مش بتحبهم بتحس إن في مشاركه ..إنتماء.

وأهي دي كمان غريبه..أنا بقيت بنتمي لأفكاره بسرعه..بقتنع بيها..بتعجبني..ساعات بسأل نفسي يمكن ده عشان بحبه؟بس حتي لو مكنتش بحبه..بلاقيها داخله دماغي ومبرر قوي..عشان أحبه..وجداً كمان.

كمان..حاسه إنه معايا بيبقي حد تاني,,هو مع الناس ليه كلمه وقرار وصوت وغيره..معايا بحس إنه سايبلي نفسه خالص,,بتكسف..ده كتير عليا..هو حلم..بسيط

وهو نفسه بسيط..ملوش في عقد وكلاكيع اليومين دول,لا تناكه ولا غرور ولا كدب ولف ودوران ولا أي حاجه..بسيط لدرجه إني مصدقش غن في بني آدم كده..هو بس اللي كده..

هناك تعليقان (2):

  1. ana 3aiza a3raf elly katba el kalam dah fe3lan 7assah we 3aishah walla mogarad sotor fe dawaween a7lamek ??
    3ashan el 7agat deh heya nafs elly ba7esso ma3a 7abeby teftekry ykono bymaselo 3alena :D

    ردحذف
  2. كلنا بشر..والحلم عند صاحبه حقيقه..:)

    ردحذف