الأربعاء، 23 فبراير 2011

يارب

يارب
أنا عمري ما جرحت حد..
ليه بيجرحوا فيا
أنا مش بلوم..ولا بعتب
أنا أصغر من ده بكتير
وإنت أكبر من كل ده
بس أنا بجد مش فاهمه

عرفت إن كل الشعرا بيتألموا في حياتهم
عشان يكتبوا قصايد تهز الناس
بطلت أكتب شعر 
وبقيت بكتب لنفسي

يارب...خليني أفضفض لك
أنا عارفه إنك عارف
بس مش فاهمه
والله ما فاهمه حاجه

اللي أعرفه إنك عادل
واللي شايفاه في الدنيا مش مفهوم
الناس اللي بتكدب بتوصل أسرع
والناس اللي بتخون..الناس بتحبهم
والناس اللي بترجح وبتدوس..كل الناس بتجري عليهم

والطيبين..متبهدلين
أنا مبقولش إني طيبه
بس نفسي أتعلم أبقي زيهم 

يمكن غلطت
وتوبت
وغلطت
وتوبت
وغلطت
وتوبت
وهفضل كده لحد ما أموت

كل الناس بتغلط
وكل الناس بتتوب

يبقي أنا ليه مش زيهم
ليه مش بكدب وأتكتك وأخون وأجرح وأعمل كل اللي بيعملوه

أنا بقيت عامله زي حد بيعذبوه
كل شويه واحد ييجي
يبتسمله.. يفتكر معاه طوق نجاه
ووقت ما بقرب أصدق إنه مش جلاد
بلاقي الضربه اللي تقسمني نصين

أنا عايزه أصرخ
نفسي أصرخ
ومش عارفه

 الوجع اللي جوايا
لو طلعته بصريخ
هيصحي كل الميتين..من يوم ما كان في حاجة إسمها بشرية
أما اللي عايشين..مفيش أمل فيهم

طب وديني للي بنتمي ليهم
مادام الأموات بيفهموا اللي بقوله
ع الأقل بيسمعوني
وديني ليهم

مهما كانت حقيقتهم مرعبة
بس خلاص
الوش اللي بيكدبوا بيه ع الناس راح
زي ما كل حاجه بتروح

أوحش حاجة في الحقيقة
إنها زي الشبح
اللي بيطلعلك في الضلمة
بصوت مرعب
مبتصدقش..وتفتكر إنه خيال من عندك
لحد ما يقرب منك
وتفتكر إنه هيموتك
الشبح مش بيموت
بيرعبك بس
بيبيّن لك عضم وشه اللي مات من زمان 
بيبينلك الحقيقة

ويسيبك
لا هتعيش زي ما كنت
ولا إنت قادر تموت وتبقي شبح
-------
أختي اللي خبطت عليا الباب وأنا بكتب
كانت عايزه الشنطة الزرقاء
اللي كنت مجهزاها مع لبسي الجديد
اللي لسه ملبستوش
كنت مجهزاها..عشان أقابلك بيها

معرفش ليه خبيت وشي منها
زي ماما..اللي كنت واقفه جنبها إمبارح
وكانت بتغني 
"كان بيقولي بحبك..أيوه..كان بيقول
وأنا من لهفة قلبي .. صدقته علي طول "

هي فاكره إني كويسة
وكانت بتغني وهي بتضحك
س..أنا مش هقدر أقولها إني منمتش من أول إمبارح
مش هقدر أوريها وشي..وعينيا حمرا من كتر العياط
مش هقدر أقولها إني  محتاجه حد يحضنني
وأنا في حضنه
يقتلني
ساعتها بس  هموت مرتاحه

زي كل المرات اللي موت فيها قبل كده
وكل مره..كنت بقول دي آخر موته

يارب
معرفش إنت مطول في عمري ليه
كفايه عشرين سنة
والله العظيم كفاية
كفاية

هناك 5 تعليقات:

  1. لأ جرحتى ناس ولسه بتجرحيهم يا بسمه
    راجعى نفسك كويس واعتذرى ليهم وقولى الحقيقه يمكن يسامحوكي
    ووجعتى ناس فى حبايبهم
    وبتتعاملى مع الناس بغرور كأنك احسن واحده فى الدنيا
    مبقولش الكلام دا عشان اضايقك انا بقوله عشان افوقك

    ردحذف
  2. لأ يا حبيبتي أنا مجرحتش حد
    ولو تحبي نتكلم عرفيني بنفسك وأنا مستعدة أثبتلك

    ردحذف
  3. so simple ...

    يعنى انا مش بتكلم علشان صاحبة بسمة ... بس انت كدة بتتكلمى عن حد تانى
    وزى ما قالتلك بسمة... لو انتى حاسة انها اذت او جرحت حد جل من لا يسهو قوليلها
    اللى متأكد من حاجة مش يتخفى فى اسم مش اسمه

    بسمة ...
    يااااااااااااارب

    ردحذف
  4. اولا لو الموت هو الحل ياريت كلنا نموت
    ثانيا :انتي عملتي ايه للموت عشان تتمنيه معتقدش انك ضعيفه
    ثالثا:كل امرئ خطاء وخير الخطائين التوابين
    وعلي فكره الي يعرف بسمه
    عمره ما يقول عليها مغرورة
    بس ممكن نقول انه مجرد حقد طبقي او ثقافي يلا يا بسمه ربنا يصبرك علي الحقد ده والي شايف انها كده يبعد عنها
    فكريبني اجبلك خرزه زرقا عشان الحسد
    :)

    ردحذف
  5. والله يا بسنت ده اللي بقوله
    أنا اللي يعرفني كويس مش هيستخدم أساليب زي دي
    ولو صاحب حق هيظهر ويعلن عن نفسه

    ونبطل بقي حركات العيال دي


    إسلام .. مش ضعف ، بس تغيير
    وانا لو غلطت في حق حد بعتذرله فورا .. اما علاقتي بربنا تخصني

    وابقي هات الخرزة مش هقولك لأ
    :))

    ردحذف