الثلاثاء، 17 أبريل، 2012

ضحك بلاستيك



·         * بقالي كتير مبكتبش ، وبقالي كتير بسمع كلمة "انتي قوية " .. وبضحك !

·         * ضهري وجعني من الوقوف الكتير ، أنا بحب المشي ، بس مبحبش أمشي وسط الناس .. بتخنق من نظراتهم ، كلامهم ، ضحكهم .. هو احنا ليه مع بعض علي نفس الكوكب ومش عارفين نلاقي بعض ؟ الناس بتزاحم بعض ع الحياة.. ناقص بس حد يزقّك عشان يوقعك من فوق الارض خالص .. بس الأرض مش مربعة  ، و كل اللي بتزقه بيرجعلك من الناحية التانية .


·         انا مبلفش وبدور في الكلام .. بس مبعرفش اقول اللي جوايا بالظبط ، بعرف بس مبقيتش أحب ، مبقيتش أحب أقوله مش مبقيتش أحب ، ولا أقولك .. أنا فعلا مبقيتش أحب .

·         لما كنت قاعدة مع أصحابي في وسط البلد آخر مرة ، كان كل اتنين قاعدين بيتكلموا مع بعض ، وانا غطست في الكرسي  وبصيت لفوق .. بصيتلك ..

-          اللي واخد عقلك
-          بردانة
-          الجو حلو
-          السما مغيّمة . .

·         عمري ما زهقت من السما .. لما ببص فوق بحس ببراح .. بحس اني بتنفس .. وحشتني .. هو احنا ينفع نتقابل ؟ أنا .. عايزة اعيط بس  . زمان لما كنت بحس بحاجة كنت بعملها علي طول ، دلوقتي بقي مينفعش أضحك أو أعيط غير بحساب ، بالذات مع ناس كتير ميعرفونيش

-          مينفعش تعيطي عشان هيقولوا عليكي ضعيفة
-          بس .. انا عايزة اعيط .. مخنوقة
-          اجمدي .. خليكي قوية
-          هم الأقوياء مبيعيطوش ؟

·         كنت بهزر مع صاحبتي ، بقولها "أنا زهقت من كوني سينجل" ردت"مانتي اللي غلطانة .. انتي لما بتعجبي بحد بتعامليه باحترام زيادة عن اللزوم ، الرجالة بيحبوا الضرب بالجزمة .. لو نفضتيله واديتيله بجزمتك هيجري وراكي " رديت "وأنا ازاي هحب واحد اديتله بالجزمة؟!" .

·          الشغل بيعلمك كتير ، تضحك غصب عنك في وش ناس "لأنك لو كشرت هيفتكر التكشيرة له " ، "اصحى وألبس وأنزل من بيتنا فـ 10 دقايق بعد ما كنت بعملها في ساعة !"..وأهم حاجة عندك حجة تتهرب بيها من ناس مش عايز تشوفهم ، ببساطة "عندي شغل"! .

·         أكتر كلمة بسمعها لما حد يشوفني من غير كُحل "بيبي فيس"  .

·         أنا بقيت بضحك مجاملة ، ودي حاجة مضايقاني من نفسي ، بحس ان حد حاطط مشبكين في شفايفي عشان اضحك إجباري .. بضحك وأنا بجزّ ..

·         أنا زعلانة من نفسي   وكل ما أدرك الحقيقة دي أفتكر جملة باولو كويلو في "على نهر بييدرا هناك جلست ، فبكيت" لما كان بيقوله "لماذا أقع في نفس الخطأ كل مرة ؟ - لأنك لم تتعلم الدرس بعد" ..أيوة ..أنا متعلمتش الدرس لسه .. عايزة أقابل باولو كويلو !

·         الحياة كلها بقت Fake.. عايزة أقابل حاجة حقيقية تعمللي توازن

·         هم قالولي مينفعش أسألك السؤال ده .. بس بجد ، ربنا .. انت عارف ..مش كده ؟ شاهد؟ طب أقولك على حاجة ؟ ربنا ..  أنا بحبك .. طب .. هحلف بإيه وأنا بكلمك ؟!






هناك تعليقان (2):

  1. ادام الله عليك الصدق
    وازال الله عنك كل هم وحزن
    سعدت بمدونتك
    وفاء

    ردحذف