السبت، 31 ديسمبر، 2011

شُكراً 2011


عايزة أقول شكراً لكل حاجة أو حد كان السبب في سعادتي ولو لجزء من الثانية
·         كل الناس اللي بشوفهم في الميدان ، اللي بَعَد القنبلة من جنبي  .. واللي كان واخد طلقة في دراعه ولسه واقف ، واللي اداني ماسك الغاز عشان مدوخش .. واللي فوّقني لما دُوخت ، واللي كان بيموت قدامي .. واللي ماتوا فعلا .. شكراً لكل الناس اللي خلتني أرجع أصدق إن لسه في بني آدمين في الدنيا .
·         شكراً لأصعب يومين قضيتهم في طرقة المستشفي وأنا مستنية ماما تخرج من العناية المركزة .. شكراً يا ماما عشان لما غبتي عرفت إني أقدر أتحمل مسئولية بيت لوحدي طول النهار.. حتي لو كنت بعيط بالليل .
·         شكرا لـ بابا اللي اداني كنز من الكتب (ماما بتصوّت كل ما تشوفهم ) :d
·         شكرا للأوغاد عشان بتخلوني أكتشف الجزء القوي في شخصيتي . وشكراً للناس اللي بتخرج من حياتي .. عشان بتسيبوا مساحة يدخل مكانكم نور وهوا .  
·         شكراً للشاب اللي دخل وسط النار والدخان وأنقذني من حادثة العربية يوم 27 رمضان  .. وطبعا شكراً للحادثة اللي غيرت فيا كتير جداً
·         شكرا للراجل اللي في مركز الإبداع اللي كل ما بفتكره أنا وصاحبتي هبة بنموت من الضحك
·         شكرا للست اللي جات طبطبت علي كتفي وأنا في مقام الحسين ، وقالتلي وهي بتبتسم وأنا عينيا مدمعة "متخافيش .. ربنا بيحبك" .. واختفت .
·         شكرا للبنتين اللي كانوا مزوغين من المدرسة وشالوا معايا الشنط من اسبوعين و وصلوني في مشواري  .
·         شكرا لأصحابي اللي دايما بيبقوا جنبي وبيستحملوا جناني وعصبيتي واكتئابي وموجات الضحك الهستيري  والتهييس والقلش الرخم :d
·         شكرا لكل حد عمل مزيكا أو أغنية حلوة تُهت فيها .
·         شكرا لكل حد عمل فيلم حلو .. شكرا للناس اللي خلتني أحب السينما .. وشكرا لألباتشينو اللي رجعني لأيام المراهقة وخلاني أحب نجم سينما :d
·         شكرا لأصحابي جوه و بره مصر اللي لسه متقابلناش .. نفسي جداً أقابلكم كلكم .
·         شكرا لكل حد كتب حاجة حلوة 
شكرا لـ أوضتي اللي بتحتويني بكل حالاتي .. 
·         شكرا لكل حد أخدت من وقته ولو دقيقة .. وقرأ لي قصة أو مقال أو تدوينة أو أي حاجة .. شكراً للناس الحقيقية الصادقة اللي بتلهمني دايماً .. وشكراً أكتر للناس اللي بتهتم إنها توصل لي رأيها بأي طريقة .. اللي بتصحح  وبتضيف وبتدعمني وبتشجعني وبتقيّم أسلوبي وبتنقدني بصدق وبشكل راقي جداً .. وبتفتحلي أبواب جديدة  .


الخميس، 22 ديسمبر، 2011

مُراوغ


* الأرواح والأفكار والأحاسيس .. ميعرفوش الحواجز .



*الأرواح المجروحة بتعرف و بتحس وبتطبطب علي بعضها .. علي عكس أقطاب المغناطيس المتشابهة .. السؤال مين هيغلب ؟ الطبيعة (إن الأقطاب المختلفة تتجاذب ) ولا الحقيقة ؟ .



*من فترة كان في سؤال بيلح عليا أوي عايزة أسأله لحد فوق الـ 30 سنة "بطلت تتخدع في الناس؟" ولما سألت واحد عنده 30 سنة قالي لأ .. وسألت واحد عنده 40 سنة سكت  .. وسألت واحد عنده 50 سنة ، بص في الأرض ..لما لقيت واحد عنده 60 سنة مسألتوش . بس مبقتش أصدق لما حد يقولي إنتي بتتخدعي عشان لسه صغيرة .



* أصحابي هم دايما أجمل حاجة في حياتي .. حرام عليكم .. بتخلوني أفتكر إن الناس بره زيكم !


* كل ما حد بيخرج من حياتي بزعل

وبعد فترة بكتشف إنه مكنش ينفع يبقي فيها

وبعد فترة بكتشف إنه مكنش يستاهل يبقي فيها

وبعد فترة بكتشف إنه ميستاهلش أزعل عليه

ودايما بعرف إن ربنا بيختارلي  الأحسن

لما حد بقي يخرج من حياتي .. بقيت أنط لآخر خطوة علي طول وببقي عارفة إن ده الأحسن .. أنا نفسي بس أبطل أزعل .



  • ساعات بخاف من أحلامي .. أول مرة أخاف من فراشة في الحلم مع إني بحبهم في الحقيقة !  
  • عايزة أروح عند البحر .. أي بحر .. وحشني جداً


* عجبني أوي لما قالي "انتِ ذكية .. متحدثة لبقة وبتعرفي تقنعيني ". ضحكت .. ضحكة أنا بس اللي أعرف معناها !



السبت، 10 ديسمبر، 2011

معادلات (غيـاب)



* عايز تختبر قوّتك .. اتعامل مع الناس .عايز اختبار أقوى .. ابعد عنهم . وأقوى اختبار .. اتعامل مع نفسك !

في ناس مجرد  انك تشوفهم تفرح .. الدنيا بتتغرق مزيكا وألوان وورد بسرعة جنونية  .. دول بالذات بخاف أشوفهم .. وبخاف أكتر لما مشوفهمش .

*   من عجائب العقل البشري ، مجرد التلميح له بفكرة يبدأ يبني عليها أحلام وأحلام وأحلام .. مبيعملش حساب القدر والنصيب والظروف .. يفضل قدامك واحد من اختيارين .. يا تمشي ورا أحلامك ..وتعمل مش شايف ، أو تعمل مش شايف أحلامك .. وتمشي ! 


* الناس هتبقي أحلي بكتير لو فهمت جنان بعض ، لو سمعت الصوت الحقيقي اللي جوه الشخص التاني ، بدون عوائق ، وحسابات ، وعيب وميصحش . صوتك الداخلي عامل زي الحصان اللي ملوش لجام ، يا تربطه وتسيبه يقاوح .. يا تسيبه يجري بيك .


*  لما بلاقي حلم صعب أحققه لوحدي ، ببقي نفسي أقول لحد .. تيجي معايا ؟ وساعات فعلا بجرب ، بس دايما بلاقي "أصل/ بس.. مش .. ليه ؟" .. هو أنا غريبة عشان بسيب نفسي لأحلامي ؟ ولا الناس بتفكر بعقلها زيادة ؟ وده ميمنعش إني ساعات بفكر بعقلي وأقول لنفسي "بطلي هبل يابت انتِ " !

*   البُعد بيصحي فيك حاجات كتير  .. أبسطها الحلم بالطيران .

*   في المسافات .. جرب تعمل زوم للصورة ( In & Out )   .. كل مرة هتشوف صورة أوضح للمعاني اللي مكنتش فاهمها .

* لما تشوف حد واحشك أوي ، ومتقدرش تقوله .. اعرف انك مش شايفه من كتر الحواجز والسدود اللي بينكم . في كل مرة بمرّ بموقف زي ده بفتكر علي الحجار لما بيقول  "إزاي يطول جرح الغياب حد السما ؟"  وبحس إنها مش صدفة أبدا إني أقول لنفسي "متصدقيش" .. وهو نفس اسم الأغنية !
 

لما كنت بعمل اللي في دماغي ، مكانوش بيمفهموه .. ولما بقيت أعمل اللي في دماغهم ، مبقتش بفهمني .


* فتي أحلامي .. حد  بسيط  .. بسيط لدرجة التلاشي  . 

*  كل ما بسأل "ممكن؟" بترد عليا نفسي "وليه لأ .. أكيد ممكن " .. و كل مرة بنسي إن السؤال مش موجه ليا  .. والإجابة مش عندي !

 
* لو بس يبقي معايا كاميرا في أحلامي .. هتفهموا أنا قصدي إيه ..



معادلات 1  هنا

font-size: large;