الأحد، 13 نوفمبر، 2011

معادلات

* ماما بتقولي إني بقيت عصبية أوي من بعد الحادثة - قبل الحادثة كنت عصبية بس ..دلوقتي بقيت عصبية أوي  :D ! - أنا عارفة ده وحاسة بنفسي ومش متضايقة خالص  ، وفي نفس الوقت بنكر معرفش ليه .. يمكن لأن مفهومي للعصبية اتغير ، .. يمكن لأني مبقيتش بسكت لناس كتير كنت بسكتلهم .. فكانوا بيدخلوا بحميرهم ببهايمهم بحيواناتهم الأليفة وغير الأليفة .. صباح الظروطة يعني :))

* سمر أختي تُلحّ عليا في موضوع الخطوبة .. وكأني هروح أتقدملها !  :D:D:D

* لما قولت لغادت صاحبتي إن الحالة الوحيدة اللي ممكن أفكر فيها في الجواز ، هو إن العريس يكون شبه ألباتشينو
وطبعا بما إن دي غادت التي لا تتزعزع ولا تترعرع ولا بيجرالها أي حاجة غير إنها بترجع ، فقالتلي متفكريش في الجواز أحسن لأن مفيش حد شبه ألباتشينو !

* كنت بقول لـ دينا صاحبتي إني بفكر أرتبط  علي سبيل المزحة يعني - حلوة المزحة دي - فبصتلي كده وقالتلي انتي بالذااااااااااااات خليكي في الكتابة .. لو فكرتي تتجوزي هبلغ عنك .. قولتلها يا سلام ! وأنا كمان هبلغ عني .. (البت عندها حق بصراحة ) :D:D

* مهما كان اللي بينك وبين صحابك .. لما بيبعدوا عنك فترة ، المية المتعكرة بتروق ، وبتحس إنك كبرت وإن اللي فات كله كان لعب عيال وهم أكيد بيحسوا بكده .. وبيوحشوك .. وتتقابلوا ولا كأن في حاجة حصلت !




* بمناسبة الحادثة .. كل اصحابي يعرفوا تفاصيلها وحصلت إزاي .. بس محدش سألني  انتي شوفتيها إزاي ؟! أو أثرت فيكي إزاي - وطبعا بعد ما حد يقرأ الكلام ده وييجي يسألني  مش هعرف أرد
عايزة أحكي لحد .. مش عارفة مين هو .. ممكن هتبقي ست تقعد  جنبي في وسيلة مواصلات صدفة !

*أنا بحب التفاصيل .. بتحسسني إني جوه الحاجة أوي .. لما حد بيحكيلي حاجة حصلتله بحب تفاصيلها عشان أتخيلها زي ما حصلت .. بس انشغالي بالتفاصيل سرق رؤيتي للصورة الكبيرة ..   الزووم هيجنني .. In  ولا Out  ؟!

* بقالي تقريبا 3 اسابيع بشوف كل يوم نفس الحلم ، مبقتش عارفة أنا بشوفه ولا بخلقه .. هو بييجي ولا أنا بروحله ؟ .. هو حقيقي ولا أنا خيالية ؟ .. هو حلم ولا بجد ؟  .. الأكيد إن  أنا بحب أحلامي ، ومنكرش إني بخاف منها  .. ساعات ..

*ربنا يبعد عننا الأخ مورفي بقوانينه الكئيبة .. والنبي مش ناقصاك


* في حاجة غلط في معادلة حياتي .. هي نفس الحاجة اللي بتخليني أشتري شنطتين فوشيا وجملي مع إني نازلة أجيب شنطتين أبيض وأسود ! .. كل مرة بحاول أكتشفها .. يا إما انا مش عارفة أنا عايزة إيه ، أو إني عارفة بس في مساحة لتغيير رأيي .. أو إني فعلا بلاقي حاجة أحسن من اللي ببقي عايزاها !

*في حاجة غلط برضو في معادلة حياتي .. هي بالظبط زي ما كنت بعمل شاي وانا في تالتة ثانوي وكنت بحط سكر (أيام ما كنت بشربه بسكر )  وشاي ومكنش بيطلع شاي !
كل مرة ..
شاي + سكر + مية مغلية = حاجة غريبة
شاي + سكر + مية مغلية = حاجة غريبة
شاي + سكر + مية مغلية = حاجة غريبة
لحد ما اتضايقت جدا .. هو في إيه !!.. الشاي مبيطلعش مظبوط ليه !!!!!!!:@
ببساطة .. لأني كنت بحط ملح مكان السكر !.. لما اكتشفت الحقيقة دي تنحت .. ومت من الضحك .

* باسنت سألتني عن البوست قبل اللي فات بتاع "ريم  " وقالتلي في حاجة غلط في البوست ، إيه علاقة الكشكول الأخضر بتاع ريم الصغيرة ، بريم الكبيرة .. الإجابة واحدة .. إني دايما بحب حاجات غلط .. مش ستايلي  أصلا !

الحب الحب :))

هناك تعليقان (2):